Fary
Ny fary dia zavamaniry famboly, volena indrindra hahazoana siramamy izay alaina avy amin' ny tahony. Ao amin' ny vondron-karazana Saccharum, ao amin' ny fianakaviana Poaceae na Gramineae, sy ny zana-pianakaviana Panicoideae ity zavamaniry ity, Eo anelanelan' ny 2 sy 6 m ny halavan' ny fary ary mety mahatratra 5 sm ny savainony rehefa lehibe.
Teo amin' ny tantara dia efatra no karazana fary novolen' ny olombelona voalohany indrindra avy eny amin' ny natiora, indrindra ny Saccharum officinarum (novolen' ny Papoa any Ginea Vaovao), ny Saccharum sinense (novolen' ny Aostrôneziana tany Taioàna sy tany amin' ny tapany atsimo amin' i Sina), ny Saccharum barberi (novolena tany India taorian' ny fampidirana ny Saccharum officinarum). Novolena tany Ginea Vaovao koa ny Saccharum robustum.
Ankehitriny ny Saccharum officinarum dia ampivadina amin' ny Saccharum spontaneum, amin' ny Saccharum robustum, amin' ny Saccharum sinense, ary amin' ny Saccharum barberi, mba hahazoana vokatra tsara kokoa. Nanampy azy ireo ny vondron-karazana mifanakaiky aminy (Miscanthus sy Narenga ary Erianthus.). Ny fary no miantoka ny famokarana siramamy betsaka indrindra (70 hatramin' ny 80 %). Anamboarana alkaola (etanôly) koa ny ranom-pary.
Mihoatra ny 1,9 lavitrisa taonina (raha mbola vaovao) na 570 tapitrisa taonina eo ho eo (rehefa maina) ny habetsaky ny famokarana fary isan-taona, ka mhatonga azy io ho iray amin' ny zavamaniry ambolena betsaka indrindra maneran-tany.