ميئن پۊشته کاخ ايته جه گيلان ٚ أنزلي تاريخي بينأئن ايسه ؤ أنزلي ميئن پۊشته محل ٚ دۊرۊن نهأ. أ کاخ هأسأ مۊزه ايسه ؤ مردۊم تأند اۊن ٚ جه دئن بۊکۊند.
ميئن پۊشته کاخ
أ كاخ ميئن پۊشته دۊرۊن ؤ غازيان ٚ پۊرد ؤ أنزلي پۊرد ٚ بين نهأ ؤ پۊر زيمي ؤ باغ ؤ فضای سبز دأره. قبل أنکي أ کاخ چأگۊده ببه، أن ٚ جا سر خۊشتاريا کاخ نهأ بۊ گه ايته رۊسي تاجر ٚ شين بۊ. أ تاجر «آکاکي مفؤدیویچ خۊشتاريا» نام دأشتي ؤ گۊرجستان ٚ آباشای ٚ شين بۊ گه اۊ زمات ايته بخش جه تزاري رۊسيه بۊ. خۊشتاريا اۊ زمات ايران ٚ کلسيا نفت ٚ ايمتياز-أ دؤلت ٚ جه فيگيته بۊ ولي رۊسيه اينقلاب ٚ وأسي نتأنسته خۊ کار-أ شرۊع بۊکۊنه ؤ خۊ ایمتياز-أ بۊفرؤخته ؤ ايران ؤ اينگيليس ٚ نفت ٚ شرکت-أ فدأ. خۊشتاريا هأتؤني ايته جه أول کساني بۊ گه برق ٚ صنعت-أ بأرده ايران ؤ اۊ زمات گه ايران ٚ مئن هئجيگا برق نأشتي خۊشتاريا کاخ شو ٚ تاريکي مئن پۊر سۊ زئي ؤ همه کس ٚ نظر-أ جلب گۊدي. رضاشاه قۊدرت گيتن ٚ پسي، رضاشاه سفر وأسي بأمؤ أنزلي ؤ اۊ کاخ-أ بيده ؤ اۊ کاخ ٚ جه أن-أ خۊش بأمؤ ؤ اۊن زيبايي جه تعريف بۊگۊده. خۊشتاريا ني گه خأستي شاه نظر-أ جلب بۊکۊنه ؤ اۊن ٚ أمرأ ريفئق ببه خۊ کاخ-أ پيشکش بۊگۊده ؤ رضاشاه-أ فدأ. رضاشاه ني اۊ کاخ ٚ عوض ايته ساختمان-أ تئران ٚ بهارستان ٚ دۊرۊن خۊشتاريا-یأ فدأ. أ کاخ تا ۱۳۰۷ پابرجا بۊ تا أنکي اۊ سال آتش بيگيته ؤ کامل بۊسؤخته. بأزين اي سال ٚ پسي رضاشاه دستۊر بدأ گه ايته جديد ٚ کاخ اۊن ٚ جا سر چأکۊند ؤ اۊن طراحي-أ ني ايراني معماران أنجام بدأده ؤ چن سال ٚ پسي ؤ ۱۳۱۳ تا ۱۳۱۴ شمسي سالان ٚ مئن، پهلوي سلطنتي عمارت گه هأسأ ميئن پۊشته کاخ نام دأره چأگۊده بؤبؤسته ؤ تا هأسأ ني پابرجا ايسه...دۊمباله
