Tuisblad

Welkom by Wikipedia, die vrye ensiklopedie wat deur enigiemand verbeter en uitgebrei kan word.	Maandag, 6 Oktober 2025 Hier is tans 126 549 artikels in Afrikaans.
Help ons om ’n wêreldklas-ensiklopedie in Afrikaans te skep.

Inleiding • Hulp • Kontak

Gebruikersportaal • Voorbladartikels • Kategorieë • Stel ’n vraag

Voorbladartikel

Windhoek (Duits: Windhuk, luister (hulp·inligting); Engels: Windhoek, [wɪndhʊk]; Herero: Otjomuise, letterlik: "plek van stoom"; Nama: ǀAi-ǁGams) is die sentraalgeleë hoofstad van Namibië en lê in die Khomashoogland. Die stad is ongeveer 1 655 m bo seespieël. Dit beslaan 'n oppervlakte van 5 124 km² en volgens die 2023-sensus het dit 'n bevolking van 486 169 gehad.

Die stad het ontstaan by die plek van 'n permanente warmwaterbron wat bekend was aan die plaaslike herderstamme. Dit het spoedig ontwikkel nadat Jonker Afrikaner, kaptein van die Oorlam, hom daar gevestig en 'n steenkerk vir sy gemeenskap opgerig het. In die daaropvolgende dekades het talle oorloë en gewapende vyandelikhede gelei tot die verwaarlosing en vernietiging van die nuwe nedersetting. In 1890 is Windhoek herstig deur die Keiserlike Duitse leër-majoor Curt von François, toe die gebied deur die Duitse Keiserryk gekoloniseer is en dit die hoofstad van Duits-Suidwes-Afrika geword het. Tussen 1920 en 1990 was die stad die administratiewe sentrum van Suidwes-Afrika in die Unie van Suid-Afrika en is sedert die onafhanklikheidwording van Namibië op 21 Maart 1990 die hoofstad.

Die stad is geleë in die Windhoek-bekken, naby die land se geografiese middelpunt, omsluit deur die Erosberge in die ooste, die Auasberge in die suide en die Khomashoogland in die weste en noorde. Met sowat 20% van die Namibiese totale bevolking is Windhoek verreweg die belangrikste ekonomiese sentrum van die land en ook die sentrale knooppunt in die Namibiese vervoerstelsel. Byna al die Namibiese of in Namibië aktiewe maatskappye het hul hoofkantoor in Windhoek, wat ook 'n voortgesette immigrasie uit ander dele van die land tot gevolg het en op sy beurt Windhoek se sentrale posisie verder onderstreep. Vandag is Windhoek 'n moderne stad wat Duitse en Afrika-invloede meng.

...lees verder

In die nuus

Die 13de Vrouekrieketwêreldbekertoernooi duur voort met groepwedstryde in verskeie stede van Indië en Sri Lanka, die twee gasheerlande.
In Engeland klop die gasvroue Engeland tydens die eindstryd van die tiende Vrouerugbywêreldbekertoernooi Kanada met 33–13 en palm sodoende ná 1994 en 2014 hul derde titel in. Nieu-Seeland eindig in die derde en Frankryk in die vierde plek.
Australië, Frankryk, Kanada, Portugal en die Verenigde Koninkryk erken die Staat Palestina as 'n onafhanklike land volgens internasionale reg.
Op Ellispark in Johannesburg klop die Griekwas tydens die eindstryd van die Curriebeker 2025 die Goue Leeus met 27–25 en palm sodoende hul vierde titel in.
Chile, Kanada, Tonga, Uruguay en die Verenigde State kwalifiseer vir die Rugbywêreldbeker 2027 in Australië; Italië en Nederland bespreek die Europese kwalifiseringsplekke vir die T20I-wêreldbeker 2026 in Indië en Sri Lanka, vir Italië is dit hul eerste deelname aan ’n krieket- of T20I-wêreldbekertoernooi ooit.

Het u geweet...

... dat die plant Welwitschia mirabilis, wat tot 600 jaar oud kan word, slegs twee blare het? Die blare skeur die hele tyd tydens die plant se lewe en laat dit lyk asof hy baie blare het.

... dat 'n eenvoudige hangbrug se dek 'n kettinglynvorm volg? Die kettinglyn lyk amper soos 'n parabool en is die vorm wat 'n hangende buigbare ketting of kabel aanneem as dit onderwerp word aan 'n eenvormige gravitasiekrag.

... dat 'n Noord-Germaanse of Skandinawiese taal vroeër in Skotland gepraat is? Op die Shetland- en Orkney-eilande en in Caithness op die vasteland is die uitgestorwe Norn gepraat. Nadat die eilande in die 15de eeu deur Noorweë aan Skotland teruggegee is, is dit deur Skots vervang.

... dat die skrywer J.R.R. Tolkien op 3 Januarie 1892 in Bloemfontein gebore is? Sy pa is kort voor sy geboorte na Suid-Afrika verplaas, waar hy aan die hoof van 'n Britse bank gestaan het. Die toekomstige skrywer is egter op driejarige ouderdom terug na Engeland geneem.

... dat 'n hartvorm (♥) deur 'n wiskundige funksie geteken kan word? Die funksie staan bekend as 'n kardioïed en kan eenvoudig gedefinieer word in poolkoördinate.

Vandag in die geskiedenis

6 Oktober: Duits-Amerikaanse Dag in die Verenigde State

1794 – Franse Rewolusie: Keulen (in die huidige Duitsland) word deur Franse troepe beset.
1900 – Tweede Vryheidsoorlog: Die Oranje-Vrystaat word amptelik deur die Verenigde Koninkryk geannekseer as die Oranjerivierkolonie.
1976 – Die Kulturele Rewolusie in die Volksrepubliek China kom tot 'n einde met die arrestasie van die "Bende van Vier".
1981 – President Anwar Sadat van Egipte sterf in 'n sluipmoordaanval tydens 'n parade in Kaïro ter herdenking van die Jom Kippoeroorlog.
1995 – 'n Artikel in die tydskrif Nature kondig aan dat 'n planeet wat om 51 Pegasi wentel ontdek is, die eerste buite ons sonnestelsel.